Magahatag na ang provincial government sang performance based bonus sa mga empleyado sang Kapitolyo bilang kabahin sang ila bonuses para sa bulan sang Disyembre, nga amu ang magabulos sa Incentive Benefits for Exemplary Services (IBES) nga gindumilian na sang Commission on Audit.
Madumduman nga sang Oktubre, ginkumpirmar ni Provincial Administrator Atty. Rayfrando Diaz nga makapila ka beses na nga gindisallow sang COA ang paghatag sang IBES bangud suno diri, indi klaro ang legal basis ini.
Suno sa iya, luyag ni Governor Eugenio Jose “Bong” Lacson nga kun ano ang legal kag ginasuportahan sang COA, amu lamang na ang padayunon apang wala ini nagapatimaan nga indi na makabaton sang mga bonuses ang mga Capitol employees.
Suno diri, sila ang magapangita sang iban nga pamaagi nga makahatag sang mga bonus nga ginapahanugutan sang COA.
Sa interview sang Bombo Radyo kay Diaz, ginpahayag sini nga magahatag ang probinsya sang performance based bonus apang indi ini uniform ukon palarehos kada empleyado kag magadepende sa salary grade.
Suno diri, ini ang magabase man sa paglab-ot sang isa ka empleyado sang iya performance target.
Magluwas sa IBES, magapabilin naman ang tanan nga mga bonuses nga ginabaton sang mga empleyado sang gobyerno kun Disyembre.
