Ginpasalig nanday Senator Francis Pancratius “Kiko” Pangilinan kag Congressman Wilfrido Mark Enverga nga matun-an ang mga concerns sa sugar industry kasunod sang ginpatigayon nga Public Consultation sa Talisay City, Negros Occidental.
Ini bangod sa tuman nga pagsarurot sang millgate price sang kalamay.
Sa public consultation, nagtambong sanday Pangilinan, nga chairman sa Senate Committee on Agriculture, Food and Agrarian Reform kag Congressman Enverga nga chairman sa House Committee on Agriculture.
Yara man ang representative gikan sa nanarisari nga sugar federatjons kaangay sang National Federation of Sugar Planters (NFSP), Confederation of Sugar Producers Association Inc. (CONFED), United Sugar Producers Federation (UNIFED), Panay Federation of Sugarcane Farmers Inc. (PanayFed) kag National Congress of Unions in the Sugar Industry of the Philippines (NACUSIP) nga grupo sang mga small planters.
Yara man ang pamunuan sang Sugar Regulatory Administration kag iban pa nga national agencies kag local public officials.
Ang kada sugar federation ang ginhatagan man sang tyansa nga makapabutyag sang ila concerns.
Isa diri ang NACUSIP nga nanindugan nga ang nagapanguna nga rasun sang tuman nga pagnubo sang millgate price sang kalamay amo ang sugar importation.
Kasubong man ang kurapsyon kaangay sa bahin sang middleman kun sa diin tuman ka barato ang pamakal, apang mahal pagdangat sa merkado.
Panawagan sang mga ini nga gilayon nga mahatagan sang solusyon ang problema.
Ginpangayo naman nanday Pangilinan kag Enverga ang demand letters gikan sa tagsa ka sugar federation.
Suno kay Senator Kiko, kaangay sa kun paano nila ginsolusyonan sadto ang problema sa bugas, hatagan man nila sang sulosyon ang sa kalamay.
Suno diri, ginlimit nila ang importasyon sa bugas, kag ginbasi lamang sa kun pila ang kulang kun basihan ang demand kag ang local production.
Gindumili man ang importasyon kadungan sang milling season.
Suno kay Senator Kiko, dapat matumod ang national sugar consumption per capita kag local production sang kalamay, kag hinali nga kulangon didto na lamang mag-import, agud malikawan ang over importation.
