1,524 ka mga estudyante sa Mandalagan Elementary School ang magabaton sang libre nga school supplies gikan sa Bacolod City government.
Sa interview sang Bombo Radyo kay Leo Ceralbo, principal sang Mandalagan Elementary School, tuman ang pasalamat niya sa mga school supplies nga batunon sang mga kabataan bangod dako ini nga bulig para sa mga ginikanan kun sa diin ang budget nga para sa gamit sa eskwelahan ang igabakal nalang sang kinahanglanon sa sulod sang balay.
Suno kay Ceralbo, ila gid nabatyagan nga nagakabalaka ang gobyerno sang Bacolod sa mga pumuluyo.
Apang ila ginatarabaho ang pag-arkila sang service para makuha ang mga school supplies sa Bacolod City National High School kun sa diin siya bilang principal kaupod sang mga manundulo sang eskwelahan ang naghatag sang budget para makakuha sang salakyan, apang ila man ginalauman nga mas maayo kun may ara sang service nga magagikan sa ciudad.
Mensahe ni Ceralbo sa mga ginikanan nga indi pagpabay-an nga mag-absent ang ila kabataan bangod nga ginahatagan nila sang importansyan nga makahibalo magbasa, magsulat kag magkilala sang mga numero ang mga kabtaan.
Sa karun, ila ginsolusyonan ang kakulangan sang classroom sa pagrenovate sang ila nga library nga mangin isa classroom, kag ila man ginkay-o ang mga guba nga bangko para maakomodar ang tanan.
Magabaton ang kabilogan nga 1,524 ka mga estudyante sang Mandalagan Elementary School sang school supplies sa adlaw sang Lunes ukon Martes.
