Nahimo nga marescue sang Coast Guard personnel ang mag-amay nga dutayan lamang malumos sa beach sa Barangay 5, Sipalay City.
Sa interview sang Bombo Radyo Bacolod kay Lt Junior Grade James Carbajosa, commander sang Coast Guard Sub-station Sipalay City, ang mga biktima ang ginalakipan sang amay nga Police Staff Sergeant sa Silay City Police Station kag ang 16 anyos sini nga bata nga babayi.
Suno kay Carbajosa, kaadlawan sang pulis kag sila ang nag-outing upod ang pamilya.
Una naman nila nga gin-abisuhan ang mga biktima nga indi magpadulong sa madamol bangod mabaskog ang current sang baybayon.
Apang ang mag-amay ang nagpatunga kapin 30 metros gikan sa pangpang kag bangod sa mabaskog nga pagbalod, sila ang gin-anod sa madalom nga bahin sang baybayon.
May nakakita naman sa ila nga nagapangayo sang bulig, kag gilayon nga ginreport sa mga Philippine Coast Guard (PCG) personnel.
Nahimo nila nga marescue ang mag-amay sa sulod sang tatlo tubtob lima ka minutos.
Gilayon man nga gindala ang mga biktima sa Sipalay City Health Office kag ginrefer sa ospital sa ciudad sang Bacolod.
Panawagan ni Carbajosa sa mga magapaligo sa dagat nga panilagan ang behaviour sang baybayon kag magkonsulta sa mga abiso sang PCG kag Disaster Risk Reduction and Management Office agud malikawan ang mga maritime incidents.
Ginpahanumdom man sini sa mga lifeguards nga mangin alerto kag bantayan gid ang mga nagapaligo, ilabi na nga madamo sang mga turista nga bag-o lamang sa lugar nga wala makahibalo kun sa diin nga bahin sang dagat ang dapat likawan.
