Nakaangkon sang pilas sa idalom sang mata ang isa ka police personnel sang Bacolod Police Station 5 matapos nga ginsumbag sang isa ka estudyante gamit ang pitchikorno sa Barangay Granada, Bacolod City kahapon, Agosto 14.
Sa interview sang Bombo Radyo Bacolod kay Police Major Andy Ofalia, station commander sang Bacolod Police Station 5, nalabayan sang tropa ang naga-skate board nga estudyante kag nagatabok sa Burgos Street gani ginsaway niya ini bangud madamo sang nagagwa nga estudyante kag mga salakyan nga nagasugat bangud natabuan man nga buhi na sang klase.
Suno kay Ofalia, wala matalupangdan sang police nga may yara pa sang estudyante nga nagabantay kag hinali ini nga ginsumbag kag gilayon man nga nagdalagan sa sulod sang eskwelahan.
Nakaangkon ang police sang pilas sa idalom sang nawala nga mata kag ilong.
Gindala man ini sa ospital agud nga madapatan sang pagbulong.
Nagkoordinar man sila sa eskwelahan agud nga matumod ang estudyante nga nagsumbag sa police.
Samtang nagsurrender na ang bata nga nagsumbag sa police matapos ang follow-up operation kag nakalab-ot na sa ginikanan ang iya ginhimo.
Ang police ang nagapaayo na sa karun samtang ang bata ang ginturn-over sa women’s rescue para sa nagakaigo nga disposisyon.
