Gin-athag sang hepe sang Talisay City Police Station nga indi assigned sa ila police station ang pulis nga ginaalegar nagpalupok sang armas sadtong December 31 sang gab-i sa syudad sang Talisay.
Sa interview sang Bombo Radyo kay Police Major Jigger Gimeno, pasado alas-11 sang gab-i sadtong Disyembre 31, nagpadulong sa ila talatapan ang isa ka persona nga wala na ginhingadlan sang hepe agud ireklamo si Police Executive Master Sergeant Renzie Lambayog nga assigned sa Silay City Police Station apang nagapuyo sa Pueblo San Antonio, Barangay Zone 12-A, Talisay bangud ginaalegar nag-palupok sang iya armas sang makaduha ka beses.
Suno kay Gimeno, nagalambat sa dalan ang salakyan sang police gani ginbosinahan ini sang makapila ka beses sang tagreklamo kag may gamay pa nga pagbinaisay nga nagluntad.
Makaligad ang pila ka minutos, ginpa-pahigad man sang pulis ang iya nga salakyan, apang liwat sya nga ginbalik sang tagreklamo sa diin mas nag-init pa gid ang ila pagbinaisay kag santo sa alegasyon, nagbunot sang armas ang pulis kag nagpalupok sang makaduha ka beses.
Sa pagpadulong sang mga kapulisan sa lugar, wala sila sang narekober nga bala rason nga indi pa matumod kun ano nga sahi sang armas ang ginpalupok kag wala naman sang may nakasaksi nga nakapalupok gid man ang pulis magluwas sa bata kag asawa sang tagreklamo.
Ginpanginwala man ni Lambayog ang alegasyon batok sa iya rason nga nagpadala na sang sulat ang Talisay City Police Station sa hepe sang Silay City Police Station nga si Police Major Rollie Pondevilla nahanugod sa nasambit nga reklamo.
Personal man nga nagpadala sang separado nga sulat ang talatapan sang Talisay CPS sa ginareklamo nga pulis nga i-turn over ang iya nga armas kag magapaidalum sa paraffin test agud mahibaluan kun nakapalupok gid man sya ukon wala.
