Gin-ako ni Punong Barangay Hercy Sibug sang Barangay 7, ciudad sang Bacolod nga kulang pa ang iya nga ginbayad sa artist nga ginkuha sang barangay agud nga magtrain sa ila nga nangin pambato sa Street and Arena Dance Competition sang MassKara Festival 2022.
Sa Facebook post ni Jonel Borromeo Peñol, gintag sini ang Bacolod Yuhum Foundation kag si Mayor Alfredo Benitez sa pagpanawagan kag pagreklamo batok kay Punong Barangay Hercy Sibug bangud sa masobra isa ka bulan na nila nga hulat sang ila bayad nagikan sa barangay.
Sa interview sang Bombo Radyo kay Sibug, naintindihan sini ang bashing nga iya nabaton sa social media.
Suno kay Sibug, indi siya ang personal nga nagkuha kay Peñol bilang artist, apang antes ang Nobyembre 12, naga-update ini sa choreographer kag sa workers angot sa balanse nga balayran sang barangay.
Suno diri, P53,000 ang ila nga balanse antes ang November 12 apang nagbayad ini sang P15,000 sa choreographer nga si Iver Lobaton matapos nag-ayo nga siya ang unahon bayad.
Suno sa punong barangay, nakibot na lamang ini nga ginpost ni Peñol sa social media nga wala siya nabayaran sang Barangay 7.
Panindugan ni Sibug, may yara sila sang kasugtanan nga hulat-hulaton lang ang dugang nga bayad apang kumpletuhon nila ang dokyumento para sa liquidation.
Suno sa barangay official, P38,000 nalang ang balanse sa mga natungdan nga ginalakipan sang P9,500 kay Peñol; P13,500 sa mga workers; kag P15,000 sa choreographer.
Ginpaathag ni Sibug nga indi tingob narelease ang P500,000 nga assistance sang city government gani nagpangutang ang mga ini sang ginbakal sang materyales para sa costume, transportasyon kag iban pa.
