Ipalantaw sang Punong Barangay sa Barangay Alijis, Bacolod City ang tubig nga naga-awas sa highway pasulod sa Regent Pearl Homes.
Sa pagtsekyar sang Bombo News Team sa lugar, ang tubig ang nagalaksam na sang isa ka lane sa dalan, kag ang stagnant nga danaw ang nagakalumutan naman, gani madanlog para sa mga motorista kag pumuluyo.
Dugang pa nga ang tubig ang mahigko kag nagapanimaho.
Sa interview sang Bombo Radyo Bacolod kay Punong Barangay Donnie Dela Vega, ginpatabunan na sini sang nakaligad nga tatlo ka bulan ang manhole kun sa diin nagagwa ang tubig.
Samtang nanindugan man ini nga wala siya sang nabatun nga reklamo sa karun nga issue, bangod kun may letter nga mag-abot sa ila talatapan gilayon man sini nga ginapahimuan sang tikang.
Gani ginalantaw ni Dela Vega verbal lamang ang ginpadangat nga reklamo kag wala nakalab-ot sa iya nga opisina.
Ginalantaw naman sang Punong Barangay nga mahimo liwat nga ginbuhuan ang ginpatabon sini sadto sa manhole.
Suno diri, may isa ka water refilling station sa area, kag ang tubig gikan sa establishimento ang naga-ilig pasulod sa tamburong, apang mahimo nga wala na sang padulongan ang ila nga tubig sang ginsirad-an ang manhole gani mahimo nga ila ini nga ginbuksan.
Apang sa karun imbes nga pasulod sa tamburong ang tubig, ini ang naga-agwasa paggwa sa highway.
Nagalaom si Dela Vega nga magabulig ang water refilling station sa paglimpyo sa lugar, bangod sila ang may responsibilidad man diri.
Magluwas sa mga motorista kag nagalabay nga pumuluyo, apektado man ang isa ka karenderia bangod yara sa ila mismo atubangan ang danaw nga nagaresulta sa paglikaw sang iban nga customer.
Magarequest man ini sa Bacolod City Disaster Risk Reduction and Management Office (CDRRMO) nga pasuyupan ang drainage system agud maka-ilig ang tubig kag madula ang mga nagabara nga nagatuga sang pagbalik sang tubig kag pagsaka sa highway.
