Ginpasalamatan sang Punong Barangay sa Barangay Banago ang pagbululigay sang nanarisari nga Barangay kag mga ahensya kag departamento sa Bacolod City sa pagbuhi sang ila napatay na nga suba.
Sa interview sang Bombo Radyo Bacolod kay Punong Barangay Benjamin Baldo, full force ang City government kun sa diin nagbulig sa massive clearing ang 61 ka Barangay, kasubong man ang Department of Public Works and Highways, City Disaster Risk Reduction and Management Office, Bacolod Environment and Natural Resources Office, Bacolod City Police Office kag mga volunteer groups.
Sa pagclear sang mga nagabara na nga basura sa suba, ini ang liwat nga mabuhi.
Suno kay Baldo, ang pagbara sang suba ang nakita sini nga kabangdanan kun ngaa nalab-utan sang pila ka adlaw antes nagsubside ang tubig-baha nakaligad nga senimana.
Bangod malapit sa baybayon ang Barangay Banago, aminado ang Punong Barangay nga indi gid malikawan ang pagbaha, ilabi na kun mag sugat-anay ang hightide kag ang mabaskog nga ulan.
Interview with Barangay Banago Punong Barangay Benjamin Baldo
Apang indi kaangay sang nakaligad, madasig na nga magasubside kun tayuyon ang pag-ilig sang tubig sa suba.
Agud indi na masulit ang pagkapatay sang suba, sila ang magahamtang man sang Purok personnel nga magamonitor kun may nagahaboy sang basura sa suba.
Samtang ipadayun na nila ang declogging activity sa suba kada Sabado.
