Wala nagapati ang Punong Barangay sa Brgy Granada nga gikan sa New People’s Army ang sulat nga may pagpamahog nga nabatun sang isa ka school principal.
Madumduman nga nagpablotter ang school principal sa Bacolod Police Station 5 sang Enero 22 matapos ginduhulan sang sulat.
Sa sulat, ginapahayag sang grupo sang NPA nga siya ang gina-imbestihan bangod sa ginahimo nga sala.
Apang sa interview sang Bombo Radyo Bacolod kay Punong Barangay Armando Vito, nagapati ini nga indi batasan sang NPA ang magpadala sang kaangay nga sulat.
Sa nahibaluan sini, ang mga may malala na gid nga krimen amo ang ginapaandaman sang makawala nga grupo.
Suno kay Vito, wala man nakapanugid sa iya ang principal, apang ginpakita sa iya sang Barangay Kagawad ang kopya sang sulat.
Nagapati ini nga isolated case lamang ang hitabo, kag wala sang dapat ikahangawa ang mga pumuluyo, bangod malinong ang Brgy Granada.
Wala man ini sang nabatun nga madamo nga reklamo batok sa principal.
Apang aminado man ini nga may nangin isyu sadto kun sa diin ginreport sang duha ka vendor ang principal sa 888 hotline kag Department of the Interior and Local Government (DILG).
Suno diri, ginahimo lamang sang principal ang iya nga mandato sa pagsaway sa mga vendors sa gwa sang eskwelahan sa kun ano ang mga indi pwede nga ibaligya, nga nasanto man sa DepEd memorandum.
Pahayag ni Vito, nga kun ipatuman ang road clearing, magluwas sa duha ka vendor, madamo pa sang mga maulamid nga negosyo.
Bisan ang principal ang nag-ayo man nga indi dayunon ang pagpatuman sang road clearing, sa baylo ginpaseguro lamang nga wala sang mga kabataan nga ma-aksidente sa pagtabok sa dalan sa pagbakal sa nasambit nga mga vendors.
Indi man maseguro sang kapitan kun ini ang may kaangtanan sa nabatun nga pagpamahog.
