Ginpanginwala sang Punong Barangay sa Brgy Prosperidad, San Carlos City nga wala ini nagahimo sang tikang angot sa ginareklamo nga tuman ka law-ay nga dalan.
Madumduman nga gindangop sa Ipa-Bombo Ta segment ang concern sang pari kag pulis nga si Rev Fr Alexander Repaso.
Pahayag sini nga sang iya gindangop ang concern kay Punong Barangay Sostines Tranilla, ini ang nagsabat nga siya ang wala sang mahimo bangod kontra partido ang mga residente.
Sa interview sang Bombo Radyo Bacolod kay Tranilla, indi sini mahimo nga pabay-an ang iya mga constituents.
Suno diri, nasemento na ang pila ka bahin sang dalan kag may natapos na nga 2.5km.
Suno diri, masobra 600 meters na lamang ang nabilin nga wala pa masemento sa bahin sang Sitio Nabatang tubtob Sitio Kalaw-anan.
Paathag sini nga sang nakaligad ang City Government ang nagabutang sang mud rocks.
Apang sang magsugod ang pag-inulan, naghumok ang duta kag naglaw-ay ilabi na nga masami ginalabayan sang dalagko nga mga trucks.
Suno diri, indi sa karun mabutangan sang mud rocks bangod nagalutak ang dalan, gani kinahanglan pa nga hulaton nga medyo magmala antes makapadeliver.
Pahayag ni Tranilla nga kun matuod nga indi sini buligan ang mga pumuluyo bangod kontra partido, wala na dapat nasemento ang dako nga bahin sang dalan.
