Aminado ang punong barangay sang defending champion sa street and arena dance competition sang MassKara Festival nga mangin inspirasyon sa mga dancers kag sa bilog nga team ang pagdako sang premyo para sa grand champion sang kompetisyon nga P1 million.
Sa interview sang Bombo Radyo kay Punong Barangay Jerry Tingson, nagatarget ang ila nga barangay nga makahatag sang dugang nga presentation matapos ang duha ka tuig nga suspension sang festival apang batunon nila ang desisyon sang mga judges.
Suno diri, inspired man sila nga mangin performance agud nga mahatagan sang maayo nga kalingawan ang First Family nga ginalakipan nanday President Bongbong Marcos, First Lady Liza Araneta-Marcos kag ila mga kabataan.
Suno sa punong barangay, ang dako nga premyo ang magahatag sang dako nga inspirasyon sa mga dancers kun sa diin sila ang magatinguha nga magaperform sang maayo.
Sang tuig 2019, P250,000 ang ginbaton nga premyo sang defending champion.
Suno kay Tingson, ginahatag sa mga dancers ang tanan nga premyo nga makuha sang barangay kag ginahatag man sa ila ang costume.
Madamo suno sa iya sang dancers sa Estefania gani makapili sila sang best among the best, samtang lain naman ang choreographer sangsa tuig 2019.
Suno sa barangay official, handaan nila sang maayo ang kompetisyon bisan malip-ot lang ang binulan sang preparasyon agud nga madul-ong sa mga tumalan-aw ang maayo nga palagwaon.
