Dako ang kalipay sang punong barangay sang Sum-ag, Bacolod City nga apisar una nga kahigayunan nga sila ang nagpasakop sa Street Dance and Arena Competition sang Masskara Festival, nakuha gilayon sang mga ini nga mangin first runner up.
Suno kay Punong Barangay Rodney Carmona, sa una nga pagpasakop sa kompetisyon, ginalagas gid nila nga magchampion, apang dako na nga pasidungog kag kalipayan sa ila nga maangkon ang First Runner Up nga titulo.
Paathag sang Punong Barangay nga nabayluhan gid ang duha ka bulan nga sakripisyo kag pagpulaw-bugtaw sang paghuman sang costumes kag mga props bangod sa ila nga kadalag-an.
Nagdangat man sa P500,000 tubtob P1 million ang ila nga nagasto para sa preparasyon apang sila ang nakabatun man sang pila ka mga sponsors.
Apisar nga may mga ginpangatubang nga problema pahayag ni Carmona nga kaangay nga nangin mahapos lang ang paghatag nila sang solusyon gani makabig sini nga madinalag-on ang ila nga pagpasakop sa Street Dance and Arena Competition.
Nahibaluan nga ang Barangay Sum-ag ang nagbaton sang P500 mil nga premyo sa pagkuha sang first place sa kompetisyon.
Pasalig ni Carmona, nga indi na magkuha ang Barangay gikan sa cash prize kag ini ang italana na lamang para sa victory party kasubong man igahatag sa mga nagpangabudlay sa pagpreparar sa kompetisyon kaangay sang mga dancers, choreographer kag sa iban pa nga mga nagbulig sa Barangay.
Ginapasalamay man sang Punong Barangay nga wala sang nagmalasakit kag nagkalalipongan gikan sa ila nga mga partisipante sa Street Dance and Arena Competition sang Masskara Festival 2022.
