Gilayon nga ginrespondehan sang Explosive and Ordnance Disposal Team ang ginsuspetsuhan nga flash bomb nga nakit-an sa sulod mismo sang Capitol Lagoon and Park apang natukiban nga indi ini eksplosibo.
Suno kay Police Lt. Alberto Sardua Jr. sang Explosive and Ordnance Disposal Team, nakit-an ang canister pasado alas-6:00 kaina sang aga.
Apang indi flash bomb ang nakit-an sa lagoon kundi entertainment device nga may pressurized air nga nagahaboy sang unod sini sa tion nga may concert.
Suno kay Sardua, may concert kagab-i malapit sa lagoon kag mahimo nga nahaboy ini sa sulod sang lagoon.
Suno diri, pyrotechnic device nga ginagamit sa concert kag indi ini flash bomb grenade.
Indi naman makahalalit ang canister apang ginpagwa ini sa publiko agud madifferentiate ang canister sa flash bomb grenade.
May indibidwal naman nga may expertise sa pyrotechnic device nga nagauyat sini sa tion sang concert.
Suno kay Sardua, full blast ang panneling kag patrolling operations sang EOD-K9 Group agud masiguro ang safety sang mga events.
Duha ka oras antes magsugod ang event, ginasanitize na sang EOD-K9 Group agud nga maclear ang lugar.
Sa sini nga operation, apat tubtub lima ka explosive detection dogs ang ginagamit sang EOD-K9 samtang nagalibot sa venue sang event bangud 30 minutos lang ang pagsniff sang ido agud nga madetect sini ang eksplosibo.
Sa nabilin nga adlaw sang MassKara Festival, nagpanugyan si Sardua sa publiko nga indi pagtandugon ang natalupangdan nga unattended baggages kundi ireport ini sa kapulisan bangud sila ang nagakaangay nga mag-usisa sini.
