Nagtaliwan na ang beterana nga aktres nga si Gloria Romero sa edad nga 91.
Ang masubo nga balita ang gin-anunsyar sang iya bata nga si Maritess Gutierrez sa facebook.
Suno diri, sila ang nagakalisod sa pagtaliwan sang ila pinalangga nga iloy nga si Gloria Galla Gutierrez, nga mas kilala sa pangalan nga Gloria Romero kahapon sang aga, Enero 25.
Ang haya sang bangkay ang patigayunon sa Arlington Memorial Chapel sa Quezon City.
Suno kay Maritess, kadungan sang ila pagpangasubo, nagapasalamat gid ang mga ini sa suporta, pangamuyo, simpatya kag sa tanan nga nagpadala sang mensahe kag condolences sa ila, kag nagapati ini nga madamo gid sang mahidlaw sa iya iloy.
Ang public viewing ang natalana sa Enero 27 kag 28, halin alas-9:00 sang aga tubtob ala-1:00 sang hapon.
Si Gloria Romero ang nakadaog sang madamo na nga mga acting awards sa iya masobra 70 ka tuig nga showbiz career.
Siya ang nakilala man sa iya outstanding performances sa mga pelikula kaangay sang “Magnifico,” “Dalagang Ilocana,” “Tarima,” “Tanging Yaman,” kag ”Rainbow’s Sunset.”
Sang Pebrero 2024, ginhatagan pa sang star-studded tribute si Gloria, nga kilala man bilang “Queen of Philippine Cinema.”
Sang Abril 2024, siya ang ginhingadlan man bilang isa sa mga “Lifetime Achievement Honorees” sang Film Development Council of the Philippines.
