Padayon pa nga ginahibalo sang mga kapulisan ang rason sang kamatayon sang 52 anyos nga babayi nga kalansay na sang nasapwan sa Prk Michelle, Brgy Dulao, Bago City.
Ang biktima ang gina-alegar namissing sang Agosto 2025.
Sa interview sang Bombo Radyo Bacolod kay Police Lt Col. James Latayon, hepe sang Bago City Police Station, wala man sila sang nakita nga foul play kag wala man sang record nga may kaaway ang biktima.
Suno kay Latayon ang kalabera ang nasapwan alas-5:20 kahapon sang hapon sang magulang sang bana sang biktima.
Ini ang nakita sang bayaw kapin 40 metros lamang ang kalayuon gikan sa ila nga balay, sang ini ang makalabay sa area agud kuntani magpahalab sang karbaw.
Positibo naman nga ginkilala sang ila bata nga babayi ang kalansay bangod sa mga panapton nga nakita sa area, nga ginalakipan sang leggings, towel, kag underwear.
Suno kay Latayon, ginahibalo pa nila sa karun kun ngaa lapit lang sa balay nasapwan ang tul-an sang biktima apang wala gid sang may nakapanimaho.
Una na nga ginpahayag sang pamilya sang biktima nga ulihi nga nakita ang biktima sang ini ang maghalin sa ila balay sang Agosto 7, 2025 para kuntani magbayad sa iya loan sa isa ka lending company sa Florence Ville Subdivision, Bacolod City.
Apang sa pagtsekyar sang pamilya sa mga CCTV footage, wala gid makita nga nakalabay ang biktima.
Gindala na sa punerarya ang kalansay, kag ini ang ipaidalom sa post mortem examination kag DNA matching.
Sa karun padayon pa ang imbestigasyon agud mahibaluan ang rason sang kamatayon sang biktima.
