Ginalantaw nga posible nga maganubo ang rate sang kuryente sa Central Negros Electric Cooperative (CENECO) sa pagsulod sang geothermal power.
Sa interview sang Bombo Radyo kay Atty. Arnel Lapore, general manager sang CENECO, nangin maayo ang paghinun-anon sini kay Bacolod City Mayor Alfredo Albee Benitez angot sa natukiban nga P12.20 nga ginacharge sa wholesale electricity spot market (WESM) nga luyag sang alkade nga mapanubo ini sa P2.00.
Suno kay Lapore, nagsaka gid man ang rate sang kuryente apang dapat lantawon man nga nagsaka ang consumption sang consumers ilabi na sa karun nga tuman ka init.
Paathag sini, bangod sa init nga tiyempo nagdamo man ang power interruptions, apang sang nagbubo ang ulan sang nakaligad nga adlaw, gilayon man nga nabatyagan ang pagnubo sang demand kag pagrelax sang transformers.
Nagpanugyan si Lapore sa mga consumers nga indi mag-untat sa pag-obserba sa demand kag mag hagan-hagan lamang sa paggamit sang kuryente.
Samtang, ginpahayag man sang general manager sang CENECO nga indi na kinahanglan pa nga maglabay sa Bicameral meeting ang prangkisa sang Negros Electric and Power Corporation (NEPC).
