Ginpasalig sang bata ni 2nd Engr. Nixon Asejo nga indi niya pagpabay-an ang iya mga utod matapos namissing ang iya amay sang ginpalukpan sang Houthi ang bulk cargo carrier nga MV Tutor sa Red Sea sang Hunyo 12.
Si Asejo ang may tatlo ka mga kabataan kag nagtaliwan naman ang iya misis bangud sa cancer.
Suno kay Capt. Christian Domarique, tuman lang kadasig ang hitabo nga nagluntad alas-9:00 sang aga, malapit sa port sang Hodeidah sa Yemen.
Suno kay Domarique, nagpalapit sa ila nga barko ang skiff boat ukon gamay nga bangka nga masami ginagamit sang mga mangingisda.
Bangud may duha ka tawo nga nagasakay sa skiff boat, wala ini gintiro sang armed guard nga onboard sa barko sa pagpati nga ini ang fishing boat.
Lipod sa ila ihibalo, dummy lang gali ang nakit-an nga tawo kag ini ang remote-controlled boat nga may karga nga explosive.
Mas madasig ang dalagan sang skiff boat sangsa MV Tutor kag nagliko ini agud lagson ang barko. Pagdikit sa Tutor, hinali lang ini nga naglupok.
Nabuslot ang kilid sang barko gani nagsulod ang tubig sa engine room kun sa diin nakaduty si 2/E Nixon Asejo.
Nasundan pa ang pag-atake ala-1:00 sa hapon kun sa diin ginpalukpan ang pihak nga kilid sang MV Tutor gamit ang drone.
Suno kay Capt. Domarique, wala na sila nakaimbestigar bangud wala sila nakahibalo kun sa tubig ukon sa hangin ang ila kontra.
Sa mustering, didto na natukiban nga wala si Asejo.
Bangud sini, nagpangamuyo nalang sila sa accommodation tubtub nga sila ang narescue kag nadala sa Bahrain.
Ang southern Red Sea ang yara sa listahan sang International Bargaining Forum (IBF) sang high-risk and warlike areas.
Pwede nga makabalibad ang Filipino seafarers nga maglabay sa areas nga yara sa IBF list, apang kun sila ang nagpasugot nga mag-agi sa lugar, sila ang ginabayaran sang double compensation.
