Ginahulat pa sang Negros Occidental Police Provincial Office (NOCPPO) ang reconfirmatory test result sang ikaduha nga police personnel nga nagpositibo sa iligal nga druga sa ginpatigayon nga random drug test sang nagligad nga Enero 30.
Madumduman nga una nagpositibo ang isa ka Police Corporal gikan sa Candoni Municipal Police Station sang una nga semana sang Enero kag liwat nga nagpatigayon sang random drug test ang NOCPPO sa 33 ka mga PNP personnel sang Enero 30 kun sa diin nagpositibo ang isa ka Police Chief Master Sergeant.
Suno kay Lt. Abegael Donasco, OIC spokesperson sang NOCPPO, ginpahayag sini nga ila pa ginahulat ang resulta sang reconfirmatory test halin sa Manila.
Suno kay Donasco, ginhatagan ang personnel sang 15 ka adlaw agud nga icontest ukon ichallenge ang resulta sang drug test pinaagi sa pagpatest sang gingamit nga urine sa pribado nga sektor kag wala ginapanag-iyahan sang gobyerno.
Nahibaluan nga matapos sang pagpositibo sa drug test sa headquarters, ginpaidalum ini sa confirmatory test sa Philippine Drug Enforcement Agency kag positibo gihapon ang resulta.
Sa karon yara na ini sa Provincial Headquarters kag ginadumilian sa paggwa kadungan sa pagsurrender sang armas sini.
Kun maggwa na ang resulta sang reconfirmatory test, igaforward naman ang pulis sa Regional Headquarters sa Iloilo.
Iga-assign ini sa Regional Personnel Holding Accounting Unit (RPHAU) kag didto na tan-awon kun magapadayon ang kaso.
Igasylo naman ang jurisdiction sa kaso sang PNP personnel sa Regional Internal Affairs Services (RIAS) nga magalantaw sang kaso tubtob sa mafile ang kaso nga administratibo.
