Magahatag sang rekomendasyon ang regional director sang Police Regional Office 6 sa provincial director sang Negros Occidental Police Provincial Office (NOCPPO) agud nga masiguro nga hilway kag madinalag-on ang pagpatigayon sang mga dalagko nga activities sa probinsya kasubong man sa syudad sang Bacolod.
Sa interview sang Bombo Radyo Bacolod kay Police Brigadier General Leo Francisco, may yara na sila nga naplastar nga security measures bilang pagpanghanda sa palaabuton nga Panaad kag MassKara Festival.
Doblehon man sang kapulisan ang ginapatigayon nga monitoring kag pagbantay agud wala sang makalusot nga mga nagabaligya sang illegal nga druga kasubong man sang may malain nga mga tinutuyo kaangay sang snatchers kadungan sang mga events.
Suno kay Francisco, nagikan siya sa Metro Manila kun sa diin madamo sang dalagko nga kahiwatan kaangay sang Feast of the Black Nazarene gani makahatag ini sang rekomendasyon kay NOCPPO provincial director Police Col. Leo Pamitan agud mangin madinalag-on ang patigayunon nga dalagko nga event sa probinsya sang Negros Occidental kasubong man syudad sang Bacolod.
