Nagpanugyan ang isa ka registered guidance counselor sa mga ginikanan nga magtigana gid sang tion nga maistorya ang ila kabataan.
Sa Good Morning Philippines, ginpahayag ni Patrick Calamba nga may epekto sa mga kabataan ang mga hitabo sa mga eskwelahan sa iban nga bahin sang pungsod bisan wala nila ini personal nga naeksperyensyahan bangud konektado sila sa social media.
Indi palareho suno kay Calamba ang reaction sang isa ka bata sangsa iban gani indi dapat pagpaminsaron nga OK ini bangud siya ang nagahipos.
Suno sa iya, tama ka importante ang simple lang nga pagpangamusta sa bata bangud mas madali ang healing kun sila ang may masugiran.
Ang pagbantay sa mental health sang bata ang shared responsibility sang ginikanan, eskwelahan kag sang komunidad kag sila nga guidance counselor ang nagatungkad sang ugat sang problema antes maglumpat sa conclusion kun ngaa nahimo sang bata ang indi dapat.
Suno kay Calamba, wala sang liwan nga mas nakakilala sa bata kundi ang iya ginikanan gani dapat panilagan sang mga ini ang pagbag-o sa behavior.
Kun may natalupangdan nga pagbag-o, indi dapat pag-i-interrogate gilayon ang bata kundi mahimo sang opurtunidad ang ginikanan nga ini ang maistorya.
Aminado si Calamba nga kapoy ang ginikanan sa pagpangita sang kwarta apang importante nga makatigana sang bisan pila lang ka minutos agud nga makaistorya sa bata.
Nagpanugyan man ang mental health advocate sa mga kabataan nga indi kinahanglan nga lukduhon sang solo ang mga problema kundi magpalapit sa responsible adult.
