Nagapanawagan ang pila ka mga nasunugan sa Prk Katilingban, Brgy 39, Bacolod City nga kabahin sa duta nga ginabawi gikan sa Provincial Government sang Negros Occidental, nga sila ang mahatagan sang relocation.
Sa interview sang Bombo Radyo Bacolod kay Barangay Kagawad Rizalina Diaz, dako nga bahin sang nasunog nga area sa Prk Katilingban 1 kag Katilingban 2, ang kabahin sa duta sang pamilya Lizares nga gindonar sadto sa provincial government.
Apang bangod wala nagamit sa husto nga katuyuan santo sa Deed of Donations, ini ang ginabawi sa karun sang pamilya Lizares, kag ang kaso ang yara na sa korte.
Aminado si Diaz nga ang mabatun nga cash assistance sang nasunugan ang kulang pa sa pagtukod liwat sang balay.
Apang bangod wala man sila sang iban nga masayluhan, kag wala paman sang court order nga nagapalayas sa ila sa area, nagapati ini nga magabalik lamang sa area ang mga pumuluyo sa pagtukod sang bag-o nga balay.
Isa sa ginakahangaw-an nga mauyang lamang ang budget kun mag-abot ang tion nga bawion na ang duta kag sila ang ipa-demolish.
Gani panawagan sang mga pumuluyo sa Bacolod City Government nga sila ang mahatagan sang relocation area.
Sa karun, ginatul-id pa sang Barangay kun pila gid ang numero sang household nga apektado, kag kun pila sa mga ini ang nalakip sa problemado nga duta.
