Personal nga nagbisita si Bacolod City Lone District Representative Alfredo “Albee” Benitez sa Bacolod Public Plaza kagab-i.
Kaupod sini sa pagbisita sanday Councilor Al Victor Espino kag Mayor Greg Gasataya kun sa diin ginpatsekyar sini ang sitwasyon sang plaza lakip na ang lightings kag fountain.
Suno kay Benitez, makigsugilanon siya sa kontraktor sang Tourism Infrastructure and Enterprise Zone Authority (TIEZA) agud madiskusyunan kag mabalikan kun natuman ba sang mga ini ang agreeement sa ciudad partikular na ang mga design sa plaza.
Aminado ini nga may rason si Mayor Greg nga magpabutyag sang iya pagkadismaya bangud ginalauman kuntani nga mangin matahum ang plaza kag manamian ang mga magalagaw apang amo pa ang nangin resulta.
Gani suno sa Kongresista, nagakadapat lang indi pagbatunon ni Mayor Greg ang proyekto samtang wala nakay-o sang kumpanya ang proyekto.
Ginklaro man sini nga wala na sang kahilabtanan ang Local Government Unit sa budget sang proyekto bangud nagikan ini sa national government office.
Suno diri, isa man sa iya mga reklamo ang delays sa proyekto bangud kinahanglan nga maagi ang tanan sa bureaucratic approval.
Gani suno sa Kongresista, ginabantayan gid niya ang tanan nga hulag kag gasto sang gobyerno ilabi na kun government funds.
