Ginmanduan sang Kamara si Quezon City 4th District Representative Bong Suntay nga mag-atubang sa House Committee on Ethics angot sa iya kontrobersyal nga pahayag natuhoy sa aktres nga si Anne Curtis.
Ini matapos gin-aprubahan sang plenaryo sang kamara ang mga mosyon ni San Juan Rep. Belle Zamora agud i-refer sa ethics panel ang privilege speech ni Laguna First District Rep. Ann Matibag, nga nagkwestiyon sa mga nangin pahayag ni Suntay kag naghingyo sang nagakadapat nga tikang.
Naga-ugat ang kontrobersya sa mga nangin pahayag ni Suntay sa hearing sang komite sang tinalikdan nga Martes, kun diin ginpakigbato niya si Vice President Sara Duterte sa pagpahayag sini nga luyag nga pugutan sang ulo ang Presidente, kag amo man sa lahog sini nga siya isa ka “designated survivor” bangud wala ini nagtambong sa State of the Nation Address (SONA).
Suno kay Santay, ang mga pahayag sang Bise Presidente ang tuga lamang sang imahinasyon kag hindi makabig nga impeachable offense, pareho na lamang sang iya kaugalingon nga imahinasyon sang nakit-an niya si Anne Curtis nga nagresulta sang pag-init sang iya nga lawas.
Antes pa man aprubahan ang mga mosyon, ang iban nga myembro sang kamara ang nagtindog sa plenaryo agud kondenaron si Suntay.
Nagtindog man si Suntay sa plenaryo agud ipahangop ang iya nga bahin kag nagpangayo sang pasaylo sa mga na-offend, apang ginpanindugan niya nga wala ini sang malain nga intensyon.
