Ginahulat nalang sang mga local government units sa Western Visayas ang resolusyon sang Regional Inter-Agency Task Force nga mangin basehan sa pagrequire sang negative RT-PCR test result sa tanan nga magasulod sa rehiyon lakip na ang authorized persons outside residence (APOR).
Sa interview sang Bombo Radyo kay Provincial Incident Management Team commander Dr. Zeaphard Gerhart Caelian, ang resolusyon amo ang mangin basehan sang mga local chief executives sa pag-issue sang executive order nga required na ang negative RT-PCR test result bangud liwat naman nga nagsaka ang kaso sang COVID-19.
Suno kay Caelian, ginatinluan sa karon sang mga LGUs ang ila quarantine facilities nga wala sang tawo sang tinalikdan nga sinemana.
Nahibaluan nga ginapapauli naman lang ang mga locally stranded individuals kun may yara sila sang negative RT-PCR test kag wala na ginaquarantine sang duha ka semana.
Suno sa PIMT commander, wala sang tawo sa karon sa Mambukal Resort apang reserba ini sa tion nga mapuno ang quarantine facility sa Silay kag EB Magalona.
Ginpasalig naman sini nga hugot nga ipatuman sang Negros Occidental ang no RT-PCR test, no travel policy nga ginalauman mapatuman antes matapos ang subong nga bulan.
