Ginaduso sang chairperson sa Committee on Transportation and Traffic sa Sangguniang Panlungsod sa ciudad sang Bacolod ang ordinansa nga magahatag otoridad sa third party company sa pagmanage sang pay parking.
Sa pahayag ni Bacolod City Councilor Al Victor Espino, ginduso sini ang ordinansa bangod nakita niya nga may ikasarang ang ciudad nga mapatuman ang pay parking pinaagi sa pagpasulod sang third party kaangay sang ginapatigayon sa karun nga towing and clamping.
Paathag sang konsehal nga ini ang nakita nila nga pamaagi agud masolusyunan ang kakulangan sang parking spaces sa ciudad.
Magluwas sa masolusyunan nga problema sa parking, ang Bacolod City Government ang makagenerate man sang income bangod kaangay sa Metro Towing Services Inc., 20 porsyento sang collection ang nagakadto sa ciudad.
Paathag sini nga santo sa Republic Act 7160 ginahatag sa Sangguniang Panlungsod ang jurisdiction sa pagdeterminar kun diin nga mga bahin sang local ukon national road ang iconvert agud mangin pay parking.
Pasalig ni Espino nga sila ang may pila na ka lugar nga gintun-an nga sarang mangin pay parking area, kalakip na sa dalan sa tupad sang Bacolod City Public Plaza.
Sa pihak nga bahin, ang third party company naman ang magaprovide sang hardware, software kag labor.
Suno kay Espino, pinaagi sa nasambitan nga set-up indi na kinahanglan nga maghire sang City Government sang dugang nga personnel, bangod ang third party na ang magapangita sang parking attendants kasubong man magaprovide sang equipment.
Magluwas diri, sila ang may ilunsyar man nga application nga sarang madownload sa cellphone, kun sa diin sarang matsekyar kun may available nga parking space kag kun diin makita antes paman magpadulong sa isa ka parking area.
Suno diri, ginabanta P20 tubtob P30 ang sukot sa parking kada tatlo ka oras, samtang may dugang naman nga P10 tubtob P20 sa kada succeeding hours.
Nagapati si Espino nga ini ang makatudlo sang disiplina kag order sa dalanon sa ciudad sang Bacolod.
