Sarang nga ma-contempt ang resource persons nga ginpadal-an sang show cause order sang Senate Blue Ribbon Committee apang wala sagihapon nagtambong sa flood control hearings.
Suno kay Senate President Pro Tempore Panfilo “Ping” Lacson nga chairman sang committee, posible nga sanday former Ako Bicol party-list Representative Zaldy Co kag ang gina-alegar flood control anomaly “whistleblower” nga si Orly Guteza ang lakip sa mga posible magapangatubang sang contempt proceedings sa Senado.
Sang nagligad nga semana, nag-issue sang show cause orders ang Senate Blue Ribbon Committee kanday Co, Guteza, kag ang mga masunod nga mga indibidwal matapos napaslawan ini nga magtambong sa pagbalik sang flood control hearing sang Enero 19: Commission on Audit Commissioner Mario Lipana; John Paul Estrada; Mark Tecsay kag Virgilio Eduarte.
Ginpahayag ni Lacson nga wala pa natalana ang masunod nga hearing, apang ginsiling nga duha tubtob tatlo pa ka hearing ang mahimo mapatigayon.
