Nagalaom si Bacolod City Councilor Atty. Dindo Ramos sa mga otoridad nga hatagan sang kabuhi ang riding-in-tandem ordinance nga iya gin-author duha ka tuig na ang nakaligad.
Sa interview sang Bombo Radyo kay Ramos, ginpahayag sini nga sadto, madamo ang nagapamatok kag nagacritize sa iya gin-author nga ordinansa apang bangud sa nagakatabo nga pinatyanay sa ciudad sa karun, ila nakit-an nga insakto gale ang konsehal.
Suno sa iya, nga sa idalum sang nasambit nga ordinansa, wala ginapahanugutan ang riding-in-tandem alas 9:00 sang gab-i tubtob alas 4:00 sang kaagahon magluwas lang kun valid ang rason kaangay sang pagdul-ong ukon pagsugat sang bana sa iya asawa nga naga-ubra.
Suno kay Ramos, tinutuyo sini ang malikawan ang krimen kag patyanay nga nagakatabo sa karun sa ciudad tuga sang riding-in-tandem suspects.
Suno diri, sa idalum sang ordinansa, wala gid ginaprohibit ang riding-in-tandem sa nasambit nga oras apang iregulate lang kun sa diin sarang nga maparahan kag matsekyar sang mga pulis ang mga nagaangkasanay sa motorsiklo kag mapamangkot kun diin ng mga ini makadto.
Gani nagahingyo ini sa kapulisan subong man sa Bacolod Traffic Authority Office (BTAO) nga hatagan sang kabuhi ang ordinansa bangud ila ini ginpangabudlayan kag agud makit-an man sang mga pumuluyo nga ila ginaprotektahan ang ciudad.
