Magapatigayon sang duha ka adlaw nga Football for a Cause nga programa ang Rotary Club of Metro Bacolod sa Oktobre 8 tubtob 9 nga may tigulo “SIPA FOR POLIO”.
Suno kay Ericka Jane Moleje, project chair sa Rotary Cup 2022, nga ang proyekto ang konektado sa programa sang Rotary Club International nga End Polio Plus Fund.
Paathag sini nga 50 porsyento sang matipon nga funds ang pagakadto sa End Polio Plus Fund kag ang 50 porsyento ang magakadto sa local football youths sa Negros Occidental.
Suno diri, wala sang criteria para sa makapasakop sa proyekto apang kinahanglan nga maghatag sang P1,000 nga registration fee.
May ara naman sang 12 ka mga categories nga mahimo pasakupan sang teams nga luyag magpartisipar kag ini ang nakapaskil sa facebook page nga Rotary Cup Sipa for Polio.
Apang paathag ni Moleje nga ginakinahanglan nga may team ang magapasakop kag dapat lang nga magcontact sa ila sa numero nga 0995-032-2500 ukon 0999-758-8796 ukon mag message sa social media.
Ang hampang ang patigayunon sa Oktobre 8 tubtob 9 sa Bago City Sports Complex.
Suno kay Moleje indi lang taga-Negros Occidental ang makigbahin sa event bangod may mga teams na gikan sa iban nga bahin sang pungsod nga nagpabutyag nga magapasakop sa football for a cause.
Ang hampang ang may 12 ka categories samtang 16 naman ka teams ang magacompete sa kada category.
Ginalauman sang mga ini nga magadangat sa 190 ang teams nga magapasakop sa proyekto.
Paathag ni Moleje nga kada Oktobre kadungan sa “End Polio Month” ang Rotary International ang may ginapatigayon gid nga mga programa sa tinutuyo nga mapapas ang polio worldwide.
Ginapakamaayo naman sang mga ini nga gamay nalang sa karun ang cases sang polio gani mas ginapasanyog pagid tubtob pa sa Setyembre 30, 2022.
