Nagpaandam si Russian President Vladimir Putin nga i-invade nila ang Donbas Region kun indi magbiya ang mga suldado sang Ukraine.
Ini kadungan sang pagpamatok sang Russian President sa maskin anuman nga kasugtanan kun paano untaton ang gyera sa Ukraine.
Sa isa ka statement sa pagbisita sini sa India, ginpahayag ni Putin nga ila pagahilwayon ang nasambit nga teritoryo sang pwersahan ukon pagahukson ang mga tropa nga Ukrainians diri.
Sa karun, kontrolado na sang Russia ang kapin 85 percent sang Donbas Region.
Una naman nga nanindugan si Ukraine President Volodymyr Zelensky nga wala sila sang may isurrender nga teritoryo sang Russia.
Samtang, ginalauman nga iduso ni Putin ang pagbaligya sang missile systems kag fighter jets, kadungan sang iya meeting kaupod si Indian Prime Minister Narendra Modi.
Ginakabig ni Russian President Vladimir Putin nga mabungahon ang ginhimo sini nga pagbisita sa India.
Nagpatigayon ini sang meeting kay Indian Prime Minister Narendra Modi.
Gin-istoryahan sang duha ang pagpasanyog sang relasyon sang duha ka pungsod sa trade kag security.
Nalakip na ang pagtukod sang Russian-Indian pharmaceutical factory sa Kaluga region ng Russia.
Madumduman nga nagpamatok ang Estados Unidos sa malapit nga relasyon sang India sa Russia rason kun ngaa ginpapanaugan nila ini sang sanctions.
