Nagpadala na sang request agud makakuha sang kopya sang CCTV footage ang San Enrique Municipal Police Station sa management sang resort sa Barangay Tibsok angot sa nagluntad nga shooting incident nagligad nga Pebrero 13.
Madumduman nga alas-2:45 sang kaagahon sang Pebrero 13, samtang nagakaon sa sulod sang kwarto ang biktima nga ginkilala kay Ryan Villanueva, 33-anyos kag residente sang Barangay 1, La Carlota City upod ang 25-anyos nga babaye, gulpi lang nagsulod ang armado nga mga tawo, ginpagwa ang babaye kag ginpahapa ang lalaki sa sulod sang kwarto kag ginluthang.
Nakaangkon sang 28 ka mga igo sang bala sa lawas ang biktima halin sa ginapatihan 9mm kag .45 caliber pistol nga gintunaan sang iya gilayon nga kamatayon.
Sa interview sang Bombo Radyo Bacolod kay P/Capt. Renante Salgado, hepe sang San Enrique Municipal Police Station, ginpahayag sini nga nagapadayon pa sa karon ang ila nga imbestigasyon agud matumod ang motibo sa krimen.
Natalana man sila nga magrequest para sa facial sketch sang mga suspetsado.
Nahibaluan nga nakuhaan ang biktima sang isa ka improvised tooter, isa ka empty transparent sachet sang suspected shabu, kag isa ka plastic sachet sang suspected marijuana seeds kag leaves.
