Ginatinguhaan sang Sangguniang Panlungsod sang syudad sang Bacolod nga mapadangat sa board of directors sang Central Negros Electric Cooperative (CENECO) ang mga reklamo sang mga konsumidor agud nga mahimuan sang tikang ang indi na maayo nga serbisyo sang kooperatiba.
Sa interview sang Bombo Radyo Bacolod kay Councilor Kalaw Puentevella, chairman committee on energy sa Sangguniang Panlungsod, nagahimo sang tikang ang SP agud nga mabuligan ang CENECO nga mangin patas ang serbisyo nga ginahatag sa mga konsumidor.
Suno kay Puentevella, gin-invite na nila ang board of directors sang CENECO kag nagalaom man nga magatambong ang mga ini agud nga makasabat man sa mga problema nga ginapadangat sang mga konsumidor kaangay sang nagapatay-siga nga kuryente kag mga nagakalaguba nga mga appliances bangud sa masami nga brown-out.
Wala man sang nakita nga problema ang konsehal sa pagpadangat sa kongreso sang reklamo sa indi maayo nga serbisyo kag mahal nga pagpanukot sang CENECO.
Natalana naman ang pagsinapol sini kaupod ang board of directors sang CENECO Setyembre 23.
