Ginaduso sang Provincial Consultant on Energy sang Negros Occidental nga i-require sa mga power distributor ang battery storage system agud mapasulod sa base load ang solar energy.
Sa interview sang Bombo Radyo Bacolod kay former governor Rafael “Lito” Coscolluela, adlaw lamang makagenerate sang kuryete ang solar panels, ka bangod intermittent ang iya power, ini ang indi malakip sa base load sang mga power distributor.
Diri naman kinahanglan ang battery storage system agud nga volume ang mapasulod kag may mapondohan sang power supply nga magenerate sa adlaw, antes ihaboy sa grid.
Aminado ini nga madamo sang mahimo magareklamo bangod dako ang kinahanglan nga capital investment, apang pahanumdom sini nga ang tikang ang makabulig agud mapasulod bilang base load ang solar energy kag mastabilize ang power supply.
Suno diri, ang mga bag-o nga solar power plant ang may-ara na sang pasilidad, gani nagalaom ini nga iretrofit man ang iban nga wala pa.
Isa sa nakabenepisyo diri ang Provincial Capitol.
Kun sa diin nag-install sang mga solar panels sa atop sang pila ka mga opisina, kag ang sobra nga maganar nga kuryente sa adlaw-adlaw nga konsumo ang nagasulod sa net metering system.
Pahayag ni Coscolluela nga ang solar system installer amo ang nagpropose sang tikang nga nakatuga sang dako nga savings sa Provincial Government.
Nahibaluan nga ang sadto P1.5 million nga bulanan nga ginabayaran sa electric bill sang kapitolyo, ang nagpanaog sa P700,000 kada bulan bangod sa solarization.
Suhestyon naman sini nga ang pila ka milyon nga savings bangod sa cost-cutting measures ang mas maayo kun gamiton sa pagtukod sang kaangay nga mga programa sa mga komunidad.
Pinaagi sini, bisan pa may-ara sang matabo nga gyera kag madula ang koneksyon sa linya sang kuryente, may-ara gihapon sang magamit nga solar power sources.
