BACOLOD CITY — Ginbuksan na sang provincial government sang Negros Occidental ang scholarship para sa mga luyag mag-eskwela sa Northern Territory, Australia sa idalom sang Study Now, Pay Later Program sang probinsya.
Suno kay Provincial Public Information Officer Karen Dinsay, magatuon sang Hospitality Management ukon Commercial Cookery sa International College of Advanced Education sa Darwin, Northern Territory, Australia ang mga scholars.
Sarang nga maka-apply ang bonafide resident sang Negros Occidental nga nagauyat sang Bachelor’s degree sa Hospitality Management ukon Culinary ukon holder sang Diploma kag Certificate in Commercial Cookery.
Sarang lamang nga ma-qualify ang naga-edad sang 22 tubtub 30 anyos, single, may tatlo ka tuig nga eksperyensya sa amo nga field kag may maayo nga communication skills.
Suno kay Dinsay, napulo ka slots ang available sa amo nga category sang scholarship program sang probinsya.
Sila ang maga-eskwela sa Northen Territory sa sulod sang duha ka tuig kag ang provincial government ang magabayad sang tuition nga malapit isa ka milyon ka pesos.
Sa tion nga nagatrabaho na sa Northern Territory ang mga scholars, ila na nga pagabayaran ang probinsya.
Dako ang tsansa sang mga Negrense scholars sa idalom sang Study Now, Pay Later Program sang provincial government nga mangin permanent resident sang capital city sang Northern Territory, Australia.
Suno kay Dinsay, gintanyag ni Governor Alfredo Marañon Jr. ang amo nga programa bangud nga sa ila nga pagbisita didto sang tinalikdan nga bulan, nakit-an sini nga dako ang tsansa sang mga Negrosanon nga mapasanyog ang kabuhi kun didto na sila nagatrabaho.
Ini bangud nga mangin alagyan ini agud nga mangin permanent resident sang Darwin City nga amo ang capital sang Northern Territory.
Ang amo nga lugar suno kay Dinsay ang mas dako pa sa Pilipinas apang 250 mil lamang ang populasyon diri kag mas madamo ang trabaho kun ikumparar sa mga tawo.
Bangud sini, kinahanglan sang teritoryo ang dugang nga mga obreros kaangay sang mga Pinoy.
Samtang nagaeskwela ang mga scholars suno kay Dinsay, maka-income naman ang mga ini bangud ginapahanugutan sila nga magtrabaho sang 20 oras sa isa ka semana ukon 70 mil pesos nga sweldo sa isa ka bulan.
