Ginavalidate pa sang mga kapulisan ang nabatun nga sulat sang pagpamahog sang isa ka babayi nga school principal sa Brgy Granada, Bacolod City, nga nakapangalan nga gikan sa grupo sang New People’s Army.
Sa interview sang Bombo Radyo Bacolod kay Police Captain Ramie Sayson, officer in charge sang Bacolod Police Station 5, ang principal ang nagpablotter sang Enero 22.
Ini matapos ginduhulan sang sulat sang isa ka tricycle driver, nga naga-unod sang pamahog gikan sa makawala nga grupo.
Wala man nabutang sang sulat nga siya ang pagapatyon, apang ginapahayag nga siya ang gina-imbestigahan sang grupo sa gina-alegar sala sini nga ginahimo.
Suno kay Sayson, ginapavalidate pa sini sa imbestigador kun lehitimo nga gikan sa NPA ang sulat, gani wala na sini ginbuyagyag ang pangalan sang grupo.
Sang ginpamangkot ang tricycle driver, wala man sini makilala ang naghatag bangod suno diri siya ang ginsuhulan lang nga magduhol sang sulat.
Wala naman nagkomento si Sayson sa kun ano ang gina-alegar nga nakomiter nga sala sang principal.
Sa pagpangusisa sang Bombo News Team sa palibot sang buluthuan, ginapahayag nga ang principal ang principal man sadto sa Brgy Alangilan.
Apang bangod sa gina-alegar reklamo sang mga vendors batok diri, ang principal ang ginsaylo sa Brgy Granada.
Sa karun, may kaangay man nga isyu ang principal matapos ginapahayag nga ginpahalin sini ang mga vendors sa gwa sang eskwelahan.
