Ginlaragway sang mga manunudlo nga na-assign sa Casipungan Elementary School nga isa sa far flung area nga sakop sa Department of Education (DepEd) division of Himamaylan City ang masubo nga kahimtangan sang mga estudyante sa lugar.
Suno kay Anatalie Singuillo, 39 anyos, residente sa Barangay Aguisan, Himamaylan City nga tatlo ka tuig na ini nga nagatudlo sa eskwelahan sa Casipungan Elementary School sa Sitio Casipungan, Barangay Carabalan, syudad sang Himamaylan.
Apang ang eskwelahan ang yara na sa nabukid nga bahin sang Barangay kag 30 minutos pa nga lakat antes malambot gikan sa sentro sang Barangay nga may 15 kilometros nga distansya.
Bangod sini, sila ang nagatinir nalang sa eskwelahan kag nagapauli nalang kada Biyernes bangod nagadangat sa P200 ang plete sakay sa habal-habal.
Makabig naman nga dako nga sakripisyo partikular na sa mga manunudlo nga may magagmay pa nga kabataan.
Suno pa diri, ang Casipungan Elementary School ang una sini nga designation bilang Teacher 1 makaligad sang tatlo ka tuig nga pagparanking sa DepEd.
Didto sini narealisar ang mabudlay nga sitwasyon sang mga kabatan sa lugar nga wala sang kompleto nga uniporme, wala school supplies kag wala sang maayo nga pagkaon indi kaangay sa mga yara sa patag.
Dugang pa sini nga iban sa estudyante ang nagagamit nalamang sang plastic bilang suludlan sang gamit bangod wala sang bag.
Reyalidad na sa eskwelahan ang kahimtangan sang mga kabataan nga masami nagabalon nalang sang kararuton, ukon kan-on nga wala sang sud-an kag may iban nga nagasud-an nalang sang chichirya.
Apisar sa sitwasyon, madamo sang mga estudyante nga nagapaninguha gihapon sa pag-eskwela.
Ang buluthuan ang may kabug-usan nga 96 ka mga estudyante kag pito tanan nga mga manunudlo.
Panindugan ni Singuillo nga ang pagka-manunudlo ang indi lang isa ka vocation kundi isa ka obligasyon.
Samtang pahayag naman ni Sarah Jane Barcelona, teacher-in-charge sa Casipungan Elementary School nga ini man ang iya nga 1st assignment bilang school head.
Bangod sa nakita nga kabudlayan sa sitwasyon sang kabataan, sila ang naglunsyar sang Choose and Eat Correct Kids food (CHECK) project bilang kabahin sang ila nga Health and Nutrition Advocacy.
Sila ang nagatap sang mga stakeholders nga makabulig agud mapakaon ang mga kabataan.
Luyag man sini nga I-revitalize ang Home Gardening Program kag magatap man sa mga stakeholders nga mahimo makahatag sang seedlings samtang ang mga ginikanan naman nga 4Ps ang igatap nga magtanom sa eskwelahan.
Panindugan sini nga kun may-ara na sila sang produkto, sarang nila ini nga maluto para sa feeding program sang mga kabataan.
Isa man sa panawagan sini nga masolusyunan ang kakulang sang classroom ilabi na nga naguba ang isa ka classroom bangod sa bagyo Odette.
