Gin-deliver na sa Bacolod City National High School (BCNHS) ang mga school supplies nga igapanagtag sang City Government sa mga estudyante sa pre-school kag public elementary schools sa ciudad.
Sa interview sang Bombo Radyo Bacolod kay Councilor Al Victor Espino, committee chairman sang Committee on Education sa Sangguniang Panlungsod, gin-unload na kaina sang aga ang mga schools nga sang Lunes pa kuntani ideliver apang wala sang opisina bangud piyesta opisyal kag wala sang magainspection nagikan sa Government Services Offices nagikan sa syudad sang Bacolod.
Suno kay Espino, nainform naman sini ang Assistant School Division Superitendent sang Deped Division of Bacolod City.
Ginpabugal man sini nga on-time ang pag-deliver sang school supplies kag nakahingabot sa gintalana nga pagbalik sang full face-to-face classes subong nga adlaw, November 2.
Ginkalipay man sini nga natuman ang comitment sang syudad nga mahatag sa tion sang kinahanglanon sang mga estudyante ang school supplies.
Ang mga school supplies ang natalana nga ipanagtag sa 74mil ka mga enrollees sa pre-school tubtob Grade 6 sa syudad sang Bacolod.
Ginpahayag man ni Espino nga tinguhaan sini nga subong nga tuig nga mapatemprano ang bidding process agud nga sa una nga adlaw sang klase, mahatag na ang school supplies para sa masunod nga tuig.
