Ginapanginbulahan sang secretary general sang United Negros Alliance (UNEGA) ang Negros Island matapos nga nangin layi na ang SB 2507 ukon ang Negros Island Region Act.
Sa interview sang Bombo Radyo Bacolod kay Cadiz City Mayor Salvador Bading Escalante, ginapasalamatan sini ang mga mamalidha nga nagdihon sang hagna para sa Negros Island Region kag si President Ferdinand “Bong bong” Marcos Jr., nga nagpirma sini agud mangin layi.
Suno kay Escalante, isa naman ini ka pagpanghangkay sa mga Negrense kasubong man ang mga residente sang Siquijor.
Ginpahayag man sang alkalde nga bisan nangin layi na ang Negros Island Region Act, wala pa ini diri, natapos bangud ang trabaho agud nga ipatuman ang layi ang magaumpisa pa lamang.
Ginpasalamatan man ni Escalante ang tanan nga mga opisyales sa tatlo ka probinsya nga naghugpong agud nga mahatagan sang katumanan ang madugay na nga ginahandom sang tanan.
Suno sa secretary general sang UNEGA dako ang mangin benepisyo sa tion nga ipatuman ang layi sa mga pumuluyo sa isla sang Negros kasubong man sang Siquijor nga indi na ang mga ini magtabok sa pihak nga isla agud nga magkuha sang serbisyo sang gobyerno.
Indi na madelay ang pagproseso sang mga dokyumento ukon iban man nga kinahanglanon sa tion nga may bagyo ukon maglain ang tiyempo.
