BACOLOD CITY – Ginaplantsa na sang Negros Oriental Police Provincial Office ang igahatag nga seguridad sa nagahilapit nga Negros Island Regional Athletic Association (NIRAA) Meet 2017 ukon Palarong NIR sa Dumaguete City.
Sa exclusive interview sang Bombo Radyo Bacolod kay NOrPPO director Police Senior Superintendent Henry Biñas, nakig-angot na sila sa Department of Education agud mahibaluan ang numero sang mga billeting areas kag venues sang hinampang nga pagabutangan sang pulis.
Apang sa sini nga mga tinion, indi pa matumod sang provincial director kun pila ang police personnel nga iga-deploy sa field, kalakip na sa mall kag souvenir areas sa Dumaguete City nga bisitahon sang mga delegasyon.
Ang numero sang mga pulis nga ibutang sa mga billetting areas suno kay Biñas ang magadepende pa sa kadakuon sang eskwelahan kag numero sang delegasyon diri.
Pananglitan kulangon ang pwersa sang pulis sa Negros Oriental, magahinyo ang NOrPPO sang augmentation halin sa Police Regional Office 18.
Ang NIRAA Meet 2017 ang magasugod sa Pebrero 24 kag magatakop sa Marso 1.
