Nagapabilin nga malinong ang nagapadayon nga selebrasyon sang Masskara Festival sa ciudad sang Bacolod.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, humalin sang nag-umpisa ang sleebrasyon wala sang major incidents nga nagluntad sa Bacolod City Public Plaza.
Suno diri, may yara sang mga nagkaladula nga mga bag apang nagakakit-an man.
May yara man sang mga pagbinaisay sa mga festival goers nga nagluntad apang nagatahaw man ang sitwasyon.
Samtang, ginasaway man nila ang mga nagabaligya sa sulod sang Bacolod Public Plaza nga wala sang permit agud patas sa iban nga nagkuha sang permit para makanegosyo.
Ginapangabay ni Depasucat nga mapabilin nga malinong ang selebrasyon tubtob sa highlights sang Masskara Festival.
Samtang, sa bahin naman sang Bacolod City Government Center, wala man sang may narekord nga major incident sa selebrasyon.
Sa interview sang Bombo Radyo Bacolod kay Police Major Marc Joel Reclamado, station commander sang Bacolod Police Station 4, may mga bata nga nadula apang nakit-an man sang mga kapulisan kag ginturn over sa mga ginikanan.
Suno diri, may mga wallet man kag bag nga ginaturn-over sa ila kag iban na-claim naman sang mga tag-iya.
Panugyan ni Reclamado sa mga ginikanan nga indi pagpabay-an ang mga bata kun updon sila sa paglagaw kag halongan ang mga kagamitan nga indi madula.
