Ginpahayag sang konsehal kag abogado sa ciudad sang Bacolod nga wala na sang pulos ang ginapatigayon nga Senate hearing angot sa mga kaso ni Kingdom of Jesus Christ founder Pastor Apollo Quiboloy.
Sa interview sang Bombo Radyo Bacolod kay Bacolod City Councilor Atty Renecito Novero, yara na sa Korte Suprema ang mga kaso batok sa pastor.
Bangod may-ara sang kaso, ano man nga ihambal sini sa Senate Hearing ang mahimo magamit nga ebidensya batok sa iya.
Bangod sini, ginagamit na lamang ni Quiboloy ang iya kinamatarong nga makapabilin sa paghipos agud nga wala sang may magamit batok sa iya.
Kag bangod wala sang makuha nga impormasyon ang Senado, ginalantaw ni Novero nga wala sang kapuslanan ang ginahimo nga imbestigasyon.
Dugang pa sini nga unfair ang pagpatigayon sang Senate hearing bangod ang akusado ang wala ginapahanugutan nga magdepensa para sa kaugalingon, kag wala man ginapasabat ang ila abogado.
Samtang indi man macross examine ang gina-imbetar nga witnesses.
Aminado si Novero nga indi man mapauntat sang Korte Suprema ang Senate inquiry bangod separado nga entity ang legislative kag judiciary department.
Apang pahanumdom ni Novero nga ang Senate hearing in aid of legislation ang dapat may tinutuyo nga makabulig sa paghimo sang mga mamalidha sang mga layi para sa pungsod.
Apisar nga maayo nga mahatag ang nagakaigo nga hustisya, para sa abogado overkill ang gina-obra sang Senado kag kaangay nga wala na ginarespeto ang privacy, constitutional rights kag dignidad sang akusado.
Suno diri, dapat nga ihatag na lamang sang Senado sa Korte Suprema ang paghatag sang nagakaigo nga hustisya.
