Pormal na nga nagsulat ang Senate Committee on Women, Children, Family Relations and Gender Equality sa duha ka korte nga nagauyat sang mga kaso ni Kingdom of Jesus Christ (KOJC) leader Apollo Quiboloy agud mapahanugutan ini nga magtambong sa hearing sang panel sa Oktubre 23.
Ang panel, nga ginapamunuan ni Senator Risa Hontiveros, ang naghingyo kay Pasig City Regional Trial Court Branch 159 Judge Elma Mendoza Rafallo-Lingan kag Quezon City Regional Trial Court Branch 106 Judge Noel Parel nga patambungon si Quiboloy sa imbestigasyon natuhoy sa ginaalegar mga krimen sini batok sa mga kababainhan kag kabataan nga miyembro sang KOJC.
Ang hearing ang pagpadayon sang nauna nga imbestigasyon natuhoy sa ginaalegar mga krimen ni Quiboloy, nga nagapangatubang sang mga kaso nga sexual abuse kag human trafficking.
Ang panel ang nagpatigayon sang hearings sang Enero 23, Pebrero 19 kag Marso 5 apang nauntat samtang nagahulat kay Quiboloy nga maaresto agud makatambong sa mga hearings.
