Ginlauman na ni Senator Ronald “Bato” Dela Rosa ang pagfile sang impeachment complaint sa House of Representatives batok sa iya kaalyado nga si Vice President Sara Duterte.
Sang Miyerkules, 215 ka mga kongresista ang nagperma sa nasambit nga complaint.
Suno kay Dela Rosa, iya na ini ginlauman kag nakit-an man sini ang ila effort nga i-impeach si VP Sara.
Indi naman sigurado si Dela Rosa kun ano ang mangin tikang sang Senado sa impeachment proceedings apang nagpasalig ini nga siya ang magapabilin nga neutral kun sila ang magconvene sa isa ka impeachment court.
Nagapati man ini nga ila i-tackle ang impeachment complaint kun sila ang magabalik na sa Hunyo matapos ang campaign break.
Apang suno sa iya, may posibilidad man sa pagpatigayon sang impeachment proceedings sa tion sang break depende sa rules of impeachment nga ila igadihon.
