Ginpasalamatan ni Bacolod City Mayor Greg Gasataya ang pagpledge ni Senator Juan Miguel Zubiri sang P100 million nga dugang nga pondo para sa pagtukod sang Bacolod City General Hospital.
Sa interview sa alkalde, ginpahayag sini nga sa ila meeting upod sa mga opisyales sang ciudad, Department of Public Works and Highways, City Engineer’s Office, kag City Health Office, ginklaro na nga ang P100 million ang italana para sa construction sang pasilidad, kag indi anay para sa pagbakal sang medical equipments.
Ini bangod prayoridad nga matapos ang pagtukod sang ospital, bangod target nga maka-operate na ang duha ka panalgan sa 2028; kag ifollow-up na lamang ang pagkay-o sang 3rd kag 4th floor.
Ang 4-storey tertiary hospital ang nadesinyo para sa 127-bed capacity.
Paathag man sang alkalde nga indi tingob nga gindownload ang P2.2 billion nga budget para sa proyekto, sa baylo ini ang ginadagdagan sang budget kada tuig.
Sa karun yara na sa P700 million ang nagamit nga pondo.
Malapit nalang matapos ang gwa sang first 2-stories, kag sa karun sila ang nagafocus sa pagkay-o sa inner-part sang pasilidad kasubong man sa fencing.
Tinutuyo sang ospital nga madecongest ang mga pasyente sa pampubliko nga ospital, partikular na sa Corazon Locsin Montelibano Memorial Regional Hospital.
Nahibaluan nga bangod wala sang kaugalingon nga pampubliko nga ospital ang ciudad, kadam-an sa pasyente sang Regional Hospital ang mga Bacolodnon.
