Patay ang senior citizen nga manugbaligya utan samtang nagatabok sa dalan matapos nga nabungguan sang motorsiklo sa Bangga Mabini, Barangay Mabini sa banwa sang Valladolid, kahapon sang kaagahon, Setyembre 8.
Ginkilala ang biktima kay Loreto Sandico, 72-anyos, lalaki, kag residente sang Purok Ipil-ipil sa nasambit nga Barangay.
Samtang ginkilala naman ang suspetsado kay Jerald Ayala, 23-anyos, delivery rider, kag residente naman sang Purok Malabi Barangay Crossing Pulupandan.
Suno kay Police Major Eric Doronila, hepe sang Valladolid Municipal Police Station, nagamaneho sang motorsiklo si Ayala nagikan Valladolid padulong sa ciudad sang Bago nga direksyon apang pag-abot sa lugar sang insidente iya nabungguan si Sandico samtang nagatabok sa dalan.
Nakaagom sang pilas sa ulo ang biktima samtang nasamaran man ang driver sang motorsiklo bangud sa aksidente kag lunsay ginpangdala sa ospital.
Apang ang biktima ang gindeklarar nga dead on arrival samtang ang driver sang motorsiklo ang yara sa kustodiya sang Valladolid Municipal Police Station.
