Patay ang isa ka 64 anyos nga tricycle driver matapos ginpaulanan sang bala sang tatlo ka suspect sa Crossing Bairan, Barangay General Luna, Toboso, Negros Occidental alas-5:45 kaina sang aga.
Ang biktima ang ginkilala lamang nga si Alyas Enrique, 64 anyos, residente sa nasambitan nga lugar.
Sa imbestigasyon sang Toboso Municipal Police Station, yara ang biktima sa iya balay sang hinali nga nag-abot ang tatlo ka persona nga may dala nga lain-lain nga kalibre sang armas luthang.
Hinali na lamang nga ginluthang sang tatlo si Enrique nga nag-angkon sang igo sang bala sa nagkalainlain nga bahin sang iya lawas nga gintunaan sang gilayon sini nga kamatayon.
Isa sa mga suspect ang nagsulod pa sa balay sang biktima kag may ginpangita nga armas luthang.
Kasunod sini nagpalagyo ang tatlo padulong sa nabukid nga bahin sang lugar.
Narecover sa crime scene ang anom ka basiyo sang cal. 9mm.
Ang bangkay ang gindala na sa Toboso Municipal Health Office agud mapaidalom sa post-mortem examination.
