Patay ang 86 anyos nga lalaki samtang nakaangkon naman sang 2nd degree burn ang duha ka iban pa sa sunog nga nagluntad sa Pantalan Daan, Barangay 1, Hinigaran, Negros Occidental alas-12:50 kahapon sang kaagahon.
Ang napatay ang ginkilala nga si Jose Ladimora samtang ginabulong naman sa ospital ang mag-iloy nga sanday Regina Leasos, 43 anyos kag Angelita Leasos, 93 anyos.
Sa inisyal nga impormasyon sang Bombo News Team, ang sunog ang tuga sang ginsindihan nga kandila sang pamilya.
Sa interview sang Bombo Radyo Bacolod kay Fire Officer 2 Carlo Colimbo, fire arson investigator sang Bureau of Fire Protection – Hinigaran, ginakasubo nila nga may-ara sang napatay sa sunog.
Ang kahalitan sang sunog ang nagdangat sa ginabanta balor P20,000 kun sa diin magluwas sa balay nanday Leasos, partially damaged man ang kaingod nga balay ni Jaime Dogbo.
Bangod kaagahon sang natabo ang sunog, tulog pa si Ladimora, samtang una naman nga nakagwa ang mag-iloy.
Apang sa tuyo nga masalbar ang live-in partner, nagbalik si Regina apang siya ang nadagdagan sang mga debris.
Ang duha ang yara sa karun sa Corazon Locsin Memorial Regional Hospital para sa pagpabulong kun sa diin bilog gid nga lawas ni Regina ang napaso.
