Gindeklarar na ang “severe to extreme” heatwaves sa tagsa ka estado kag teritoryo sang Australia magluwas sa Queensland.
Sa karun nagaeksperyensya sang catastrophic fire conditions ang pila ka lugar sa Australia kag ginalauman pa ang heatwaves sa kadam-an sa mga lugar sa nasambit nga pungsod.
Ginalantaw man nga makaeksperyensya sang mataas nga temperatura ang pungsod sa masunod nga adlaw.
Sa Biyernes, magadeklara ang estado sang Victoria sang “total fire ban” kadungan sang pagsaka sang fire danger rating sa “catastrophic”, ang pinakamataas nga lebel.
Sirad-an man ang yara sa 450 ka mga eskwelahan kag childcare centers.
Kahapon, Hwebes nangin mabudlay sa mga bumbero ang pagpatay sang pila ka mga sunog sa Victoria kag New South Wales kun sa diin dinosena ka mga eroplano nga nagaunod sang tubig ang ginpalapta agud nga mapatay ang dalagko nga mga sunog malapit sa ciudad sang Wodonga.
Samtang ang Melbourne naman ang nakaeksperyensya sang pinakamainit nga panahon kahapon makaligad ang anum ka tuig nga nagdangat sa 40.9 degrees Celcius.
Suno sa isa ka opisyal nagikan sa Bureau of Meteorology, sa adlaw sang Biyernes ang “real peak sang heatwave.”
Bangud sini, tuman ka init ang maeksperyensyan sa halos tanan nga lugar sa South Australia, Victoria, kadam-an sang lugar sa New South Wales kag pila ka bahin sang Tasmania.
