Ginpahayag sang pinuno sang Bacolod City Police Office (BCPO) nga indi extrajudicial killing ang nagakatabo nga mga insidente sang pagpangluthang sa Bacolod.
Suno kay Police Col. Thomas Joseph Martir, indi EJK ang nagakatabo bangud sa 12 ka mga shooting incidents sa ciudad sa bulan pa lamang sang Hunyo, may anum na ka mga suspetsado nga napasakaan sang kaso kag may iban pa nga pagapasakaan pa lamang.
Indi man vigilante nga mga grupo ang nagapangluthang suno sa iya.
Apang suno kay Martir, may yara sila sang na-identify nga gun for hire sa Bacolod nga bag-o lamang nakagwa sa prisuhan.
Suno diri, siya ang napasakaan naman sang kaso kag may idugang pa nga kaso nga igapasaka batok sa iya.
Indi naman sini pag-idisclose ang detalye sang nasambit nga gun for hire para sa proteksyon sang mga witness.
Nagapasalamat ang BCPO Director sa kooperasyon sang tanan kag ginpahayag nga ila tinguhaan nga mafile kag masolbar tanan nga kaso agud mahatagan sang hustisya ang mga biktima.
