Gindeklarar ang Silay City bilang nagaisahanon nga ciudad nga “drug cleared” na sa Negros Occidental kag sa kabug-usan sang Negros Island Region.
Sa mensahe ni Silay City Mayor Joedith Gallego, sang nagpungko ini nga alkalde sang ciudad prayoridad sini ang pag-drug clear sang ciudad.
Suno kay Gallego kun may isa ka miyembro sang pamilya nga nagagamit sang illegal nga druga tanan nga miyembro ang nadalahig bangud ang mga gamit nga napundar ang magkaladula bangud ginabaligya agud ibakal sang illegal nga druga.
Suno pa sa alkalde wala sang kilala ukon abyan basta imbulbado sa illegal nga druga bangud kun madakpan wala ini sang may mabulig.
Suno diri bisan sa iya pamilya ginhambalan sini nga kun imbulbado sa illegal nga druga wala siya sang may mabulig sa tion nga madakpan kag magpangita ang mga ini sang abugado ukon sin-o man nga makabulig sa ila.
Panawagan sini sa tanan nga Silaynon nga likawan ang paggamit sang illegal nga druga bangud wala ini sang maayo nga madulot sa kabuhi sang isa ka tawo.
Dugang pa sini nga panawagan nga bululigan ang pagkampanya batok sa illegal nga druga agud nga mapabilin nga drug clear ang ciudad sang Silay.
Ginpasalamatan sini ang Philippine Drug Enforcement Agency kag tanan nga nagbuligay agud nga madeklarar ang ciudad nga drug clear.
Ginpanginbulahan man sini ang Silay City bangud ini ang una nga City Government nga gindeklarar nga drug cleared.
